சாதிச் சங்கங்கள்
தத்தெடுக்கின்றன
தம் படைப்பாளரை
முற்போக்கு முகாமெலாம்
தத்தம் உறுப்பையே
முன்மொழிகின்றன
மதவாத எழுத்தும்
மதங்களின் அரணில்
மகிமைப்படுவன
நட்புக் குழாம் எலாம்
தன்னினம் பார்த்தே பல்லக்கு சுமக்கும்
உன்னத மானுடப் பண்பெலாம் பேசி
கட்சித் தலைவர் காலடி மண்ணை
நெற்றியில் நீறென நீளப் பூசுவர்
இச்சகம் உரைக்கும் பங்குதாரரை
வாராது வந்த மாமணி என்னும்
வானத்து அமரன் வந்தான் என்றும்
சொந்த இதழில் பரப்புரை செய்வர்
கண்கள் நீலோற்பலம்
காலத்தைத் திருப்பி உதைப்பார்
பின்நவீனத்துவக் கடைசி ரயிலின்
இறுதி இருக்கை
மனையை இனத்தை மதத்தைத்
துறந்து
அடிமைச் சங்கிலி தெறித்த மகத்துவர்
எனப்பல ஆங்கு
குழாய்த் தண்ணீரில் வெண்ணெய் கடைந்து
புத்துருக்கு நெய்யும் எடுப்பர்
நல்ல படைப்பு
வயிற்றுத் தீக்கு மெய்ப்பு படிக்கும்
காய்கறி விக்கும் வாகனம் ஓட்டும்
அடுமனை அடுப்படி பாத்திரம் விளக்கும்
உதிரிப் பாகம் உரசிக் கழுவும்
செங்கல் சுமக்கும் செருப்பு தைக்கும்
நின்று கிடக்கும் இலவச வரிசையில்
நாற்சந்தியை நடந்து கடக்கும்
நாதியொன்று இன்மையால்!
உயிர் எழுத்து ஏப்ரல் 2017
நாகரத்தினம் கிருஷ்ணா 
பொருள் பொதிந்த கவிதை